U oktobru 90. izložba automobilskog glamura u gradu svjetlosti

+5

Sajmovi automobila izgubili su zamah s epidemijom korona virusa, a onaj najveći ženevski se potpuno ugasio. Zbog toga se ovogodišnji pariški očekuje s puno znatiželje i nade da bi ovaj vid izlaganja automobilskih dostignuća mogao u budućnosti ponovo da oživi.

Od nekadašnjih glamuroznih i prestižnih izložbi sajmovi automobila postali su predstave za izbjegavanje za većinu marketinških stratega. Po njihovim ocjenama sajmovi od proizvođača zahtijevaju prevelika ulaganja i energiju za predstavljanje novosti koje su u većini slučajeva "već viđene" putem interneta. 

Bila ta konstatacija tačna ili ne, činjenica je da su sajmovi automobila imali posebnu draž za sve ljubitelje četverotočkaša, jer su im omogućavali da se iz prve ruke upoznaju s velikim brojem noviteta na jednom mjestu. Zbog te činjenice mnogi od njih s velikom radošću dočekuju ovogodišnji, jubilarni 90. sajam automobila u Parizu.

Od ovog događaja na svojevrstan način se očekuje da automobilskoj javnosti da odgovor na pitanje imaju li sajmovi budućnosti ili je pariški jubilej jedan od njihovih poslednjih trzaja. Podsjećamo da je prethodni sajam automobila u Parizu privukao manje od 400.000 posjetilaca, što je od strane proizvođača automobila veoma loše ocijenjeno. Organizator tvrdi da se ove godine svojski potrudio da navede posjetioce na prvi zaključak, odnosno da im vrati vjeru u budućnosti sajamskih predstava. 

Vrata sajamskog kompleska Porte de Versailles u Parizu za posjetioce će biti otvorena od 15. do 20. oktobra, dok će najnovije novitete predstavnici medija imati priliku da vide dan prije svih - 14. oktobra. Do danas prisustvo na ovoj prestižnoj manifestaciji su potvrdili mnogi evropski i svjetski poznati automobilski brendovi, mada se očekuje da njihov broj bude i veći jer izložbena postavka još nije konačno definisana. 

Mada ih nije bilo 2022. godine na prošlom sajmu automobila u Parizu, ove godine tu će se naći mnogi njemački brendovi poput: Minija, BMW, Audija i Volkswagena, a biće tu i češka Škoda. Ljubitelji njemačkih vozila moći će da vide nove X3 i X5 modele, Mini Aceman, Audi A5, A6 e-tron, Q6 e-tron te RS3. Velika novost biće i novi Volkswagenov SUV sa sedam sjedišta Volkswagen Tayron, koji će zamijeniti Tiguan Allspace. 

Značajna nastup očekuje i domaće proizvođače. Renault će izložiti nekoliko verzija novog R5 modela, a prava ekskluziva će biti premijera novog 4L. Alpine će predstavljati A290, dok se od Dacie očekuje premijera SUV sedmosjeda Bigstera, Dusterovog većeg brata. Pod okriljem Stellantisa biće predstavljeni novi Peugeot 5008 i Citroen C3. 

U Parizu će se naći i noviteti iz Azije i Amerike. Kineske proizvođače sigurno će predstavljati BYD, Xpeng, Seres, GAC, Skyworth, Forthing, Hongqi i Maxus. Pomalo čudan je izostanak u Evropi veoma popularnog MG-a i Great Wall Motorsa. U sajamskim kuloarima već se šuška da je to napravljeno iz bojkota zbog nedavnog povećanja carina na kineske automobile koje je između ostalog značajno pogodilo MG. Amerikance će predstavljati Ford s novim Caprijem, dok se od Cadillaca očekuje izlaganje dva modela Lyriqa i Optiqa. 

Za kraj ćemo navesti i imena proizvođača koji nisu bili motivisani za izlaganje u Parizu. Njihov spisak je podugačak i riječ je o Cupri, Seatu, Mercedesu, Hyundaiju i Kiji, Jeepu, Mitsubishiju, Nissanu, Suzukiju, Geely, Volvu, Polestaru i Zeekru.